05.08.2019

Coca Cola суперлигасининг навбатдаги 16-тур учрашувини Самарқандда “Динамо”га қарши ўтказадиган “Қўқон-1912” футболчилари , айни кунларда Тошкент шаҳрида машғулотларни олиб боришмоқда. Азиз Тўхтабоев бошчилигидаги мураббийлар штаби , футболчиларни олдинда турган ўйинга ҳар томонлама пухта тайёрлаш учун астойдил меҳнат қилишмоқда.
Жамоамиз таркибида ўзгаришлар бор. Ёзга трансфер ойнасининг очиқлигидан фойдаланган мураббийларимиз таркибга яна икки нафар футболчини жалб қилишди. “Насаф”, “Машъал”,”АГМК”, “Навбаҳор” жамоаларидаги ўйинлари билан мухлисларга яхши таниш бўлган Зафар Тўраев жамоамиз билан шартнома имзолади. Шунингдек Тошкентнинг “Пахтакор” жамоасининг яна бир ёш иқтидорли футболчиси бўлган Жаҳонгир Аҳмадов ҳам мавсумнинг қолган қисмини Қўқонликлар таркибида ўтказадиган бўлди. Жамоамизни тарк этганлиги ёзилган тажрибали қанот ҳимоячиси Жасур Хасанов ҳам яна жамоамиз таркибига келиб қўшилди.
“Қўқон-1912” жамоасининг ёш ва умидли футболчиларидан бири Муҳаммаданас Ҳасанов мавсум охирига қадар Жиззахнинг “Сўғдиёна” жамоасига ижарага берилди. Жиззахликларнинг Муҳаммаданас Ҳасанов борасидаги таклифлари , жамоа раҳбарияти томонидан ижобий қабул қилинди. Биз М Ҳасановга янги жамоасида омад тилаймиз !
Эслатиб ўтамиз “Динамо” – “Қўқон-1912” учрашуви 10-август куни , Самарқанд шаҳрида бўлиб ўтади.