13.03.2023
Bugun Qoʻqon shahri Davlat xizmatlari markazining anjumanlar zalida “Qoʻqon-1912” jamoasi safiga yangi qoʻshilgan futbolchi hamda murabbiylarni tanishtirish marosimi boʻlib oʻtdi.
Marosimda Qoʻqon shahri xokimi Maʼrufjon Usmonov ishtirok etdi:
“Oʻtgan yilgi ishlardan toʻgʻri xulosalarni chiqarishimiz lozim. Sizlar endi katta iroda bilan harakat qilishingiz kerak. Bizga hozir butun Respubika, Markaziy Osiyo qarab turibdi. Yurtboshimiz tomonidan shahrimizni rivojlantirish uchun 10 dan ortiq farmonlarni eʼlon qilindi. Bu yil shahrimiz “Turkiy davlatlar kengashining madaniyat markazi” deb eʼlon qilindi. Qoʻqon futbol maktabidan koʻplab kuchli futbolchilar yetishib chiqqan. Hozir eʼtibor berib qaradim, tarkib deyarli 80 foizga yangilangan. Endi bu sinovli davr sizlarning boʻyningizga tushdi. Endi sizlar jamoani yana Superligaga qaytarishingiz lozim boʻladi. Bu – bizning maqsadimiz va vazifamiz. Bu yilgi bosh maqsadimiz – Superligaga qaytish. Boshqa narsa haqida oʻylashga haqqimiz yoʻq. Bizda boshqa yoʻl yoʻq. Endi faqat oldinga harakat qilishimiz kerak. Bu yil ajoyib oʻyinlarimiz bilan muxlislarimizni xursand qilishimiz kerak boʻladi. Qoʻqon futbol maktabi qanday ekanligini koʻrsatib qoʻyishimiz lozim. Qanday yordam kerak boʻlsa, biz sizlarga yordam beramiz. Faqat futbol haqida oʻylab, 2023-yilda Superliga yoʻllanmasini qoʻlga kiritishimiz kerak“, – dedi shahrimiz hokimi.
Shundan soʻng «Qoʻqon-1912” jamoasining vitse-prezidenti Akramjon Mamadaliyev soʻzga chiqib, bu yilgi mavsumoldi tayyorgarliklar,”Markaziy” stadionda olib borilayotgan qurilishlar haqida toʻxtaldi:
“Oʻtgan yili nima boʻlgan boʻlsa, boʻldi. Endi biz aybdorlarni aniqlash uchun vaqt saflamasligimiz lozim. Bu yil jamoa Pro ligada harakat qiladi. Shahrimiz hokimi va rahbariyat tomonidan “Qoʻqon-1912” jamoasiga bu yil aniq vazifa – Superligaga qaytish vazifasi qoʻyildi. Biz ushbu maqsad boʻyicha faqat oldinga intilamiz.
Xabaringiz bor, oʻtgan yili PFL talablariga javob bermagani sababli “Markaziy” stadionda oʻyin oʻtkaza olmadik. Bu yil hokimimiz va jamoa rahbariyati koʻmagi bilan stadionda katta hajmdagi ishlar olib borilmoqda. Xususan, oʻtgan yilgi asosiy muammomiz boʻlgan yoritish tizimi tubdan oʻzgartirildi. Mavsumga tayyorgarlik koʻrish uchun barcha sharoitlar yaratib berildi. Shuningdek, hozirgi kunda jamoada moliyaviy muammolar yoʻq, jamoamizning hamma aʼzolari yanvar- fevral oylari uchun maoshlarini olishdi. Kelgusida har bir gʻalaba uchun oʻz vaqtida va munosib taqdirlab boriladi. Jamoa oldiga qoʻygan vazifani bajargach esa barcha futbolchilarga qoʻshimcha bonus tarzida mukofot pullari beriladi. Jamoamizga moddiy va amaliy yordamini ayamayotgan shahar hokimi va rahbariyatga minnatdorchilik bildiraman.
Bu yil har bir oʻyinlarni muxlislar uchun katta bayram sifatida oʻtkazishni reja qilganmiz. Oʻsha kuni uchrashuvga tashrif buyurgan futbol muxlisi mazza qilib dam olib ketishiga sharoit yaratib berishga harakat qilamiz. Oʻyin kunlari muxlislar uchun sovrinli oʻyinlar tashkil qilamiz. Chiroyli oʻyin uchun tashrif buyurgan muxlislar uyiga qimmatbaho sovrinlar bilan qaytishi mumkin. Bu yil jamoamizni yorqin oʻyinlari orqali muxlislarni stadionga qaytarishimiz lozim boʻladi», – deb fikr bildirdi jamoamiz vitse-prezidenti.
Shuningdek, Akramjon Mamadaliyev jamoamizning bu yilgi murabbiylar shtabi bilan tanishtirib oʻtdi.
Shundan soʻng “Qoʻqon-1912” jamoasining bosh murabbiyi Davron Fayziyev soʻz oldi.
“Avvalambor, barchaga Assalomu alaykum. Bugungi tadbirga tashrif buyurgan barchaga rahmat aytaman. Xudo xohlasa, yil yakunida Superliga yoʻllanmasini qoʻlga kiritganimiz bilan bir-birimizni tabriklash nasib etsin. Soʻzim avvalida Oʻzbekiston xalqini tabriklamoqchiman. Kecha Oʻzbekiston U-20 terma jamoasi Jahon chempionati yoʻllanmasini qoʻlga kiritdi. Shuningdek, viloyatimiz bosh jamoasi “Neftchi” kecha “Paxtakor”ni magʻlub etdi va barcha Fargʻona aholisi xursand boʻldi. Biz ham ushbu bayram Qoʻqon shahrida davom etishini istaymiz. Jamoamiz mavsumga yaxshi tayyorgarlik koʻrdi. Biz ham ajoyib gʻalabalarmiz bilan shahrimiz muxlislarini xursand qilishni maqsad qilganmiz.
Men “Qoʻqon-1912”ga 2020-yilda kelgan boʻlsam, bu yerdagi muxlislarning qanday qaygʻurishini yaxshi bilaman. Bu yil jamoada oʻzgarishlar katta boʻldi. Jamoamizda tajribali futbolchilar va yoshlar jamlangan. Jamoaga kelgan hamma futbolchilar faqat “Qoʻqon-1912” jamoasini Superligaga olib chiqish va jamoaga yordam berish uchun keldi. Barchamiz bitta maqsad uchun harakat qilmoqdamiz.
Mavsumga yaxshi tayyorgarlik koʻrdik. Tayyorgarlik davomida koʻplab oʻrtoqlik uchrashuvida maydonga tushdik. Jamoamizning yagona va bosh maqsadi – Superligaga qaytish. Buni har bir jamoamiz aʼzolari yaxshi tushunib turibdi. Bu yoʻlni bosib oʻtish oson boʻlmaydi. Bu yoʻlni bosib oʻtish uchun siz muxlislarning katta yordami kerak boʻladi. Sizlar doim qoʻllab turishingizni soʻrayman. Biz faqat sizlar uchun oʻynaymiz.
Tandiq doim boʻladi. Ayniqsa, futbolchilarga bu katta bosim boʻladi. Men doim futbolchilarga vodiyda futbol oʻynash qiyin ekanligini aytaman, chunki bu yerning aholisi futbolni qattiq yaxshi koʻradi. Sizlarni xursand qilish uchun harakat qilamiz. Soʻzim oxirida shuni aytmoqchimanki, biz siz muxlislarni qattiq hurmat qilamiz va sizlar uchun oʻynaymiz. Barchaga rahmat”, – deb soʻzlarini yakunladi jamoamiz bosh murabbiyi.
Shundan soʻng jamoamizga yangi keliib qoʻshilgan futbolchilar ommaga tanishtirildi.
Tadbirda jamoamiz muxlislari ham soʻzga chiqib, doim “Qoʻqon-1912” jamoasi bilan birga boʻlishlarini maʼlum qilishdi. Marosim soʻngida jamoa aʼzolari muxlislar bilan esdalik ucun suratga tushishdi. Shu tariqa, tadbr koʻtarinki kayfiyatda yakuniga yetdi.
