23.10.2021
Бир неча дақиқа олдин Қўқондаги “Марказий” стадионида Coca Cola суперлигасининг 23-туридан ўрин олган “Қўқон-1912” – “Локомотив” ўйини бўлиб ўтди. Учрашувда рақибга нисбатан бироз устунлик қилган вакилларимиз 2:1 ҳисобида ғалаба қозонишди.
Ўйин кутилганидек шиддатли ҳужумлар остида бошланди. Илк дақиқалардан футболчиларимиз ҳужумга зўр беришди. Ўз навбатида рақибларимиз қарши ҳужумдан самарали фойдаланишга ҳаракат қилишди. Баҳснинг 38-дақиқасида аутдан тўп ўйинга ташлангач, тўп учун курашда Якуба Бамба ҳаммадан устун келиб ўйиндаги ҳисобни очди. Голдан кейин “Локо” футболчилари катта куч билан олдинга ташланишди. Бу эса футболчиларимизга эркинроқ ўйнаш имкониятини берди. Биринчи бўлим якунланиш арафасида вакилларимиз ижросидаги комбинациядан сўнг, ҳисоб ўзгариши мумкин эди. Рақиб ҳимоячиси тўпга тегмаганида Азимов дарвозабон билан бирга-бир вазиятга чиқиб кетар эди. Шу тариқа, жамоалар танаффусга 1:0 ҳисобида чиқиб кетишди.
Айтганча, бугунги учрашувни сариқ карточкалари тўпланиб қолганлиги боис дарвозабонимиз Музаффар Абдуллаев ҳамда ҳимоячи Авазхон Маматхўжаевлар ўтказиб юборишди.
Иккинчи бўлим ҳам худди биринчиси каби шиддатли тарзда бошланди. Аммо тайм бошида жамоамиз сардори Мурод Холмуҳаммедов жароҳат сабаб майдонни тарк этди. 61-дақиқада футболчиларимиз яхши ҳужум ташкил этишди. Норбеков – Бамба-Бекмуродов иштирокидаги комбинацияга аниқ зарба етишмади. 68-дақиқада рақибларимиз ҳисобни тенглаштиришди. Футболчиларимиз бу вазиятда Туроповни кўздан қочиришган эди. Диёр ўз имкониятдан самарали фойдаланди. 75-дақиқада футболчиларимиз яна олдинга чиқиб олишди. Қарши ҳужумда дарвозабон билан бирга-бир вазиятга чиқиб борган Азимов вазиятдан унумли фойдаланиб ҳисобни 2:1 кўринишига келтириб қўйди. Ҳакам томонидан қўшиб берилган дақиқаларда Хамиддилло Абдуҳамидов учинчи голни уриши мумкин эди. Аммо ундан омад юз ўгирди. Шу тариқа, футболчиларимиз яна бир ғалабани қўлга киритишди.
ҚЎҚОН-1912 – ЛОКОМОТИВ – 2:1
Ҳакамлар: Зокиржон Қодиров, Руслан Серазитдинов, Тимур Галеев, Хушнуд Суюнбоев
Назоратчи: Равиль Шаяхмитов
Комиссар: Сардор Қудратуллаев
Голлар: Якуба Бамба 37, Сардор Азимов 75. – Диёр Туропов 68.
“Қўқон-1912”: 96. Исломжон Абдуллаев, 5. Славко Лукич, 8. Фарходбек Бекмуратов (20. Иқболжон Маликжонов, 69), 10. Шоҳназар Норбеков (9. Ҳамидулло Абдуҳамидов, 74), 13. Сардорбек Азимов, 15. Ойбек Рустамов, 22. Муҳаммаданас Ҳасанов (7. Асадбек Собиржонов, 74), 23. Александр Мерзляков, 33. Иван Йосович, 70. Мурод Холмуҳаммедов (3. Бобуржон Акбаров, 52), 91. Якуба Бамба (11. Мўминжон Мелиев, 69)
Захира: 46. Хуршид Хўжаев, 18. Анваржон Ҳожимирзаев, 19. Суҳроб Бердиев, 99. Андрей Сидоров.
“Локомотив”: 35. Жавоҳир Илёсов, 3. Исломжон Қобилов, 5. Кахи Маҳарадзе, 11. Темурхўжа Абдуҳолиқов, 14. Азизбек Амонов (54. Игор Чикризов, 81), 17. Санжар Қодирқулов (8. Жавоҳир Сидиқов, 81), 21. Ғулом-Ҳайдар Ғуломов, 27. Ислом Рашидхонов (7. Садриддин Абдуллаев, 64), 28.Шуҳрат Муҳаммадиев, 37.Шерзод Файзиев (94.Хуршидбек Мухторов, 64), 77.Диёржон Туропов
Захира: 1.Абдумавлон Абдужалилов, 10.Марат Бикмаев, 20.Жалолиддин Жумабоев, 22.Самуэль Опе, 45.Нурмуҳаммад Тошпўлатов.
