30.01.2019

Кеча Фарғонада катта футбол байрами бошланди. Ҳар йили анъанавий тарзда ўтказилиб келинаётган “Вилоят ҳоким кубоги” мусобақаси старт олди. Кеча мусобақада учта учрашув бўлиб ўтди.  Биз ҳам ўз анъанамизга содиқ қолган ҳолда “Вилоят ҳоким кубоги-2019”дан кундалик ёзишни бошлаймиз. Кундаликнинг биринчи кунида кечаги ўйинлар ҳақида сўз юритамиз.

Қўқонлик ёшларнинг мағлубияти

Фарғонада старт олган “Вилоят ҳоким кубоги-2019”да “Қўқон-1912” (U-21) ёшлар жамоаси ўзининг биринчи учрашувини ўтказди. Андижоннинг “Ўз Тонг Хо” клубига қарши кечган баҳсда қўқонлик ёшлар мағлубиятга учрашди. Учрашувни вакилларимиз фаол бошлашди. Дастлабки дақиқаларда ёшларимиз рақиб дарвозаси олдида бир қатор хавфли вазиятларни вужудга келтиришди. Бироқ ҳисобни очиш “Ўз Тонг Хо” футболчиларига насиб этди. 27-дақиқада андижонликлар жарима тўпини тепиш ҳуқуқига эга бўлишди. Тажрибали Анвар Абдуқодиров жарима зарбасини қойилмақом тарзда ижро этиб ҳисобни очди. Гол ўтказиб юборгач, вакилларимиз катта куч билан ҳужумга зўр беришди. Аммо танаффусга қадар ҳисобни ўзгартириш ҳеч кимга насиб этмади.

Иккинчи бўлимни ҳам қўқонлик ёшлар фаол тарзда бошлашди. Бироқ вазиятлардан фойдалана олмаслик оқибатида рақиб дарвозасини ишғол эта олишмади. 67-дақиқада андижонликлар иккинчи тўпни киритишди. Бу сафар Пўлат Шарифов ўзини кўрсатди. Қолган дақиқаларда Раҳматжон Иноғомов шогирдлари ҳарчанд ўринишмасин, мағлубиятдан қутулиб қолишни уддалай олишмади.

 

“Фарғона вилоят ҳоким кубоги-2019”

“А” гуруҳи

1-тур

“Ўз Тонг Хо” – “Қўқон-1912” (U-21) – 2:0 (1:0)

Ҳакамлар: Муҳаммадсултон Фозилов, Асрор Раҳматов, Даврон Маматов.

Голлар: Анвар Абдуқодиров, Пўлат Шарифов.

“Ўз Тонг Хо”: Азизбек Аблоқулов, Артур Маматказин, Фарҳод Ғофуров, Шокир Одилжонов, Бахтиёр Исмоилов, Акмал Юлдашев, Алишер Абдуллаев, Абдураҳмон Комилов, Анвар Абдуқодиров, Шоир Рўзиев, Билол Тошхўжаев.

Захира: Илёс Исмоилов, Жаҳонгир Нуриддинов, Аҳрор Иминов, Усмон Расулов, Аброр Солиохунов, Пўлат Шарифов, Аброр Комилов.

“Қўқон-1912” (U-21): Муҳаммадали Собиров, Жасур Ёқубов, Бекзод Каримов, Рамзбек Исақов, Иброҳим Мухторов, Дилшод Саминов, Дилшод Баратов, Алпомиш Телапов, Савелий Абрамов, Абдуллох Миркомилов, Аюбхон Абдуҳамидов,

Захира: Жасур Абдуллаев, Мубошир Қосимов, Охунжон Олимов, Аброр Усмонов, Азамат Жуманов, Барҳаёт Саидаҳмаджонов, Умид Муҳаммадалиев.

Ягона гол

“А” гуруҳи фаворити саналган Фарғонанинг “Нефтчи” жамоаси мусобақани ғалаба билан бошлади. Фарғоналиклар биринчи турда Яйпаннинг “Турон” клубига қарши майдонга тушишди ва ягона гол эвазига ғалаба қозонишди.

Мазкур учрашув кутилганидек шиддатли ва кескин курашлар остида ўтганини таъкидлаш жоиз. Фарғона вилоят чемпиони, тажрибали Баҳром Ҳакимов бошқараётган “Турон” жамоаси ҳам номдор рақибига етарлича қаршилик кўрсатди.

Айтганча, “Нефтчи” футболчиси Нодир Камолов пенальтини аниқ амалга ошира олмади. Унинг зарбаси дарвоза тўсинига тегиб қайтди.

 “Фарғона вилоят ҳоким кубоги-2019”

“А” гуруҳи

1-тур

“Турон” – “Нефтчи” –  0:1 (0:0)

Гол: Ҳамидулло Абдуҳамидов.

“Нефтчи”: 21. Фаррух Турдалиев, 20. Дилёр Ирматов, 23. Асилбек Ғойибжонов, 22. Достон Абдураҳмон, 33. Ислом Тошпўлатов, 34. Игорь Таран, 44. Отабек Зокиров, 64. Миржамол Неъматов, 65. Шодиёр Хожиматов, 71. Хуршидбек Асқаралиев, 91. Ҳамидулло Абдуҳамидов.

Захира: 80. Шуҳрат Раҳмонов, 3. Сирож Ҳамроев, 5. Аббос Шодмонов, 10. Анвар Бердиев, 13. Идрис Бикмайкин, 15. Нодир Камолов, 90. Илҳом Воҳобов.

“Локо”нинг қийин ғалабаси

Тошкентнинг “Локомотив” жамоаси ёшлари ҳам мусобақани ғалаба билан қарши олишди. Темур Кападзе бошчилигидаги “Локомотив” (U-21) ёшлар жамоаси Учкўприкнинг “Зафар” клубига қарши майдонга тушди. Ушбу баҳсда ҳам ягона гол учрашув тақдирини ҳал этди. Ёш “темирйўлчилар” 90 дақиқа давомида рақиб дарвозасига йўл топа олишмади. Фақат ҳакам томонидан қўшиб берилган дақиқаларда “Локомотив” (U-21) футболчилари имкониятдан фойдаланиб, муҳим уч очкони қўлга киритишди.

“Фарғона вилоят ҳоким кубоги-2019”

“В” гуруҳи

1-тур

“Локомотив” (U-21) – “Зафар” – 1:0 (0:0).

Бугун “Қўқон-1912” жамоаси ўйнайди

Бугун мусобақада яна битта учрашув бўлиб ўтади. Нўъмон Ҳасанов бошчилигидаги “Қўқон-1912” жамоаси Про-лига вакили Самарқанднинг “Шердор” клубига қарши майдонга тушади. Учрашув соат 14:00да ФарДУ стадионида ўтказилади.

АНОНС

Бугун

“Фарғона вилоят ҳоким кубоги-2019”

“В” гуруҳи

1-тур

Шердор – Қўқон-1912   ФарДУ стадиони   бошланиш вақти – 14:00

Барча мухлисларимиз Фарғона давлат университети спорт мажмуасига таклиф этиб қоламиз.

 

Аброр ДЕҲҚОНОВ тайёрлади