19.04.2020

Тошкентда хоккей жамоаси ташкил бўларкан деган гапни биринчи марта эшитганимизда барчамиз хурсанд бўлган эдик. Пойтахтимизда хоккей ўйини учун жаҳон андозаларига мос келадиган арена қурилиб, бу аренада “Хумо” жамоаси ўзининг уй учрашувларини ўтказди. “Хумо” жамоаси туфайли 30 йиллик танаффусдан сўнг Ўзбекистонда хоккей ўйини яна мухлисларнинг севимли спорт турига айланди. 

Ўтган қисқа муддат ичида “Хумо” жамоаси шу қадар кўп мухлис тўпладики, бу жамоага барча футбол жамоаларининг ҳам ҳаваси келадиган бўлди. “Қўқон-1912” жамоаси аъзолари ҳам бу жамоанинг кўплаб уй учрашувларига ташриф буюриб, “Хумо”га мухлислик қилишди. “Хумо” илк уринишидаёқ ВХЛнинг етакчи жамоаларидан бирига айланди. Жамоа Петров кубогининг чорак финалига қадар етиб боргани сўзимизга исбот бўла олади. Хумо аренадаги яратилган шароитлар, муҳит, жамоанинг маркетинг хизмати қандай ишлаши лозимлигини барчага намуна қилиб кўрсатишга лойиқ эди.
Кутилмаганда барчамиз учун қадрли бўлган “Хумо” жамоаси келаси мавсум ВХЛда иштирок эта олмаслигини эълон қилди. Биз хозирги шароитда жамоанинг бу қарорини тўғри тушунамиз. Бутун дунёда коронавирус пандемияси туфайли ноқулайликлар юзага келмоқда. Кўплаб авиакомпаниялар фаолиятларини тўхтатиб туришга мажбур бўлишмоқда. ВХЛда ўйнаш учун эса кўплаб мамлакатларга ва шаҳарларга учиш керак бўлади.
“Қўқон-1912” жамоаси келгусида “Хумо” хоккей клуби яна ўз фаолиятини давом эттиришига умид қилади. Биз сизларни яна муз ареналарига қайтишингизни яратгандан сўраб қоламиз.
Биз сени соғинамиз “ХУМО” !