07.11.2020

Аввал хабар берганимиздек Тошкентдаги “Чиғатой” стадионида , Ўзбекистон футбол ассоциацияси ҳамда Ўзбекистон футбол фахрийлари кенгаши томонидан, фахрийлар ўртасида “ЎФА КУБОГИ” мусобақасининг финал босқичи бўлиб ўтмоқда.

Бундан бир неча дақиқа олдин мусобақанинг ярим финал ўйинлари бўлиб ўтди. Дастлаб майдонга Тошкент ҳамда Қашқадарёлик фахрий футболчилар чиқишди. Қизиқарли ўтган баҳс 5-1 ҳисобидаги Тошкентлик фахрийларнинг ғалабаси билан якунланди.
Шундан сўнг бўлиб ўтган Қўқон фахрийлари ҳамда Қорақалпоғистон республикаси фахрийлари ўртасидаги ўйинда Қўқонлик фахрий футболчилар чиройли ўйин намойиш қилиб, 3-1 ҳисобида ишончли тарзда ғалаба қозонишди. Учрашув бошидан устунликни қўлга олган Қўқонликлар 1-таймни Саиджон Шокировнинг киритган голи эвазига кичик ҳисобдаги устунлик билан якунладилар.
Ўйиннинг 2-бўлими шиддатли курашларга бой тарзда бўлиб ўтди. Яна майдондаги устунлик Қўқон фахрийлари томонида бўлди. Авазхон Жўрабоевнинг узатмасидан сўнг тўпни яна ўша Саиджон Шокиров рақиб дарвозасига жойлаб қўйди. Кетма-кет рақиб жарима майдончаси атрофидаги босимлар нитажасида Қўқонлик фахрийлар учинчи голни ҳам киритишди. Бу сафар Абдумалик Юнусов ўз номини таблога ёздириб қўйди. Учрашувнинг сўнгги дақиқаларида Қорақалпоғистонлик футболчининг тепган тўпи рикошет холатида дарвозамиз тўрига келиб тушди. Шундай қилиб Қўқонлик фахрийлар Қорақалпоғистонлик фахрийлар устидан 3-1 ҳисобида ғалаба қозониб, “Фахрийлар кубоги” мусобақасининг финалига йўл олишди.
Қўқонлик фахрийлар таркибида Бахтиёр Ашурматов, Мамуржон Мансуров, Саиджон Шокиров, Авазхон Жўрабоев, Акмалжон Ортиқов каби футбол мухлисларига яхши таниш бўлган , Қўқон футболининг яқин ўтмишдаги юлдузлари майдонда тўп суришди.
Эртага мусобақанинг 3-ўрини учун Қашқадарё ҳамда Қорақалпоғистонлик фахрий футболчилар ўзаро кураш олиб борадилар. Мусобақанинг финал ўйинида эса Тошкент ва Қўқонлик фахрий футболчилар майдонга чиқишади. Финалда ҳам фахрийларимизга омад ёр бўлишини яратгандан сўраб қоламиз !

Бугунги ўйин қайдномасидан ўрин олган Қўқонлик фахрий футболчиларнинг рўйхати билан танишинг.
“Қўқон фахрийлари” таркиби: 1.Фарҳод Мусажонов, 3. Акмал Ортиқов, 7. Шерзод Позилов, 9. Саид Шокиров, 11. Воҳид Умаралиев, 14. Илҳом Сатторов, 20. Авазхон Жўрабоев, 22. Баҳром Бозорбоев, 23. Одил Исмоилов, 26. Бахтиёр Ашурматов, 35. Мамур Мансуров

Заҳирада: 16. Қаҳрамон Қодиров, 8. Муҳсин Мамажонов, 10. Абдумалик Юнусов, 17. Камол Рўзиев, 33. Шовкат Жўрабоев, 70. Жамшид Матисаев, 91. Содир Элибоев