10.04.2022
Ўзбекистон Coca Cola кубоги мусобақасининг “Д” гуруҳида 1-тур учрашувлари бўлиб ўтди. “Қўқон-1912” жамоаси Муборакда, Бухоро вилояти вакили бўлган “Ғиждувон” клубининг меҳмони бўлди.
Ўйин кутилганидек тажрибали бўлган Қўқонлик футболчиларнинг катта устунлигида бўлиб ўтди. Бахтиёр Ашурматов шогирдлари Муборак шаҳрига Тошкентдан ўйин куни етиб боришди. Бунинг устига “Ғиждувон”га қарши ўйинни жамоанинг икки нафар асосий футболчилари, Мурод Холмуҳаммедов ҳамда Жавоҳир Сидиқовлар жароҳати боис ўтказиб юборишди. Лекин бу омиллар “Қўқон-1912” жамоасининг про-лига вакилига қарши бўлган ўйинига ўз таъсирини кўрсатмади.
Учрашувнинг 1-бўлимида катта устунликка эришган “шунқорлар”, рақиб дарвозасига 3 марта тўп киритишни уддасидан чиқишди. Дастлаб 5-дақиқада Сардор Азимовнинг узатмасини Мўмин Мелиев голга айлантирди. 15-дақиқада эса Санъат Шиховнинг рақиб дарвозаси томон йўллаган зарбасидан сўнг , Ғиждувонлик Улуғбек Худойбердиев ўз дарвозасини ишғол қилиб қўйди. Орадан 3 дақиқа ўтиб яна ўша Санъат Шихов чиройли зарбаси билан мезбонлар дарвозасига 3 голни киритди. Биринчи таймда ҳужумчиларимиз Шаҳзодбек Убайдуллаев ҳамда Мўмин Мелиевларда яна бир қатор вазиятлар бўлишига қарамай рақиб дарвозасига бошқа гол киритилмади.
Иккинчи бўлимда жамоамиз мураббийлари бир қатор ёш футболчиларимизга ўйнаш имконини беришди. Майдонга тушган Илҳом Вахобов, Диёр Жалолдинов, Муроджон Комилов каби ёш футболчиларимиз ўзларига билдирилган ишончни оқлашди десак муболаға бўлмайди.
Учрашувнинг 90 дақиқасида Диёр Жалолдиновнинг кучли зарбасини “Ғиждувон” дарвозабони қайтришга эришди.Бироқ қайтган тўпга ҳаммадан олдин етиб келган ёш иқтидор эгаси Муроджон Комилов тўпни боши билан рақиб дарвозасига жойлаб қўйди. Шундай қилиб жамоамиз Ўзбекистон Coca Cola кубоги мусобақасидаги юришини йирик ҳисобдаги ғалаба билан бошлади.
ҒИЖДУВОН – ҚЎҚОН-1912 – 0:4
8 апрель 2022 йил. Муборак. Баҳром Вафоев номидаги стадиони. 16:00
Ҳакамлар: Фирдавс Норсафаров, Зуфар Элибоев, Фарҳод Усмонов, Шуҳрат Ражабов
Назоратчи: Рустам Бобомуродов
Комиссар: Бекзод Арипов
Голлар: Мўмин Мелиев 5, – 0:1. Улуғбек Худойбердиев 15 автогол, – 0:2, Санъат Шихов 18, – 0:3. Муроджон Комилов 90, – 0:4.
“Ғиждувон”: 1.Мусурмон Холмирзаев, 4.Шавкат Раҳматов, 5.Улуғбек Худойбердиев, 7.Жамшид Ҳасанов, 8.Акбар Муродов, 14.Асилжон Мансуров, 17.Сардор Сулаймонов, 19.Санжар Баратов, 31.Нодирбек Ибрагимов, 98.Акром Баҳромов, 99.Ислом Бойсариев.
Захира: 12.Ҳожиакбар Жўраев, 3.Солибек Каримов, 6.Жаҳонгир Исмоилов, 9.Сандай Лонгжи Сонг, 10.Хуан Оспина, 20.Бекзод Камолов, 26.Рамис Бегишев, 66.Раҳимжон Обидов, 78.Фарруҳ Жўраев.
“Қўқон-1912”: 21.Исломжон Абдуллаев, 5.Славко Лукич, 6.Дилшод Раҳматуллаев, 8.Санъат Шихов, 11.Мўминжон Мелиев, 13.Сардор Азимов, 15.Ойбек Рустамов, 17.Қувондиқ Рўзиев, 18.Шаҳзодбек Нурматов, 23.Александр Мерзляков, 33.Иван Йосович.
Захира: 1.Музаффар Абдуллаев, 4.Илҳомжон Ваҳобов, 7.Жамшид Ҳасанов, 14.Авазхон Маматхўжаев, 19.Диёрбек Жалолдинов, 20.Муроджон Комилов, 22.Сардоржон Етовқўзиев, 27.Анваржон Ҳожимирзаев, 70.Билолхон Тошмирзаев.
Четлатишлар: Асилжон Мансуров 81, Раҳимжон Обидов 83.
