09.07.2023

Jamoamizning yangi aʼzosi Rustam Nortojiyev jamoaga kelib qoʻshilishi va maqsadlari haqida gapirib oʻtdi.

“Ota shahrimda oʻynash imkoniga ega boʻlganimdan xursandman. Bu mening orzuyim edi. “Qoʻqon-1912” jamoasidan qiziqish boʻlganidan xursand boʻldim. Menga jamoa murabbiylari taklif bilan chiqishdi. Biz ular bilan mavsumdagi vazifani muhokama qildik va tezda kelishuvga erishdik. Jamoadagi har bir inson “Qoʻqon-1912”ni Superliga olib chiqishni maqsad qilgan. Men ham ularga qoʻldan kelgancha yordam berishga harakat qilaman. Jamoadagi futbolchilar meni juda iliq kutib olishdi. Men ularning koʻpi bilan tanish boʻlganim uchun jamoaga moslashib ketishim qiyin boʻlmadi. “Qoʻqon-1912” jamoasining koʻplab sodiq muxlislari borligini bilaman. Ularning barchasini hurmat qilaman. Ular uy va safar uchrashuvlarida jamoani ajoyib tarzda qoʻllab turishadi va bu ajoyib atmosfera hosil qiladi”,-dedi jamoamizning yangi darvozaboni.