31.10.2024
Bugun Pro liganing 25-turidan o‘rin olgan “Xorazm” – “Qo‘qon-1912” (1:1) uchrashuvidan so‘ng qo‘qonliklar bosh murabbiyi Bahrom Haydarov o‘yindan keyingi matbuot anjumanida ishtirok etdi.
“Xorazm”ning so‘nggi o‘yinidan kelib chiqib, bugungi uchrashuvga tayyorgarlik ko‘rgandik. Maydon holati tufayli kombinatsion futbol namoyish etish qiyin ekanligini bilardik. Shu sababli yakkakurashlarda g‘olib chiqish asosiy rolni o‘ynar edi. Yakkakurashlarda ko‘proq g‘olib bo‘lgan jamoa, yakunda g‘alaba qozonar edi. Bugun jangovar o‘yin bo‘ldi, hisob ham o‘yinga mos bo‘ldi. Biz g‘alabani ilib ketishimiz mumkin edi, “Xorazm” ham g‘alabaga qozonish uchun yetarlicha o‘yin namoyish etdi deb o‘ylayman. Ikki jamoa ham yengilishni istamadi. To‘g‘ri, xato va kamchiliklar ham bo‘ldi. Ularni keyinroq o‘rganib chiqamiz. Keyingi uchrashuvlarga tayyorgarlik ko‘rishimiz kerak”, – deya fikr bildirdi Bahrom Haydarov bugungi uchrashuv haqida.
– “Xorazm” futbolchisi Farruh Ibrohimov maydondan chetlatilganidan keyin ham jamoangiz hujumkor o‘yin uslubiga o‘tmadi. Jamoangiz bugun durang natijasiga ham rozi edimi?
– Biz hech qachon durang natijadan qoniqmaymiz. Biz o‘yin davomida uchta hujumchi bilan o‘ynadik. Maydon markazini kuchaytirishga harakat qildik va shu sababli bir himoyachimizni zaxiraga oldik. Son jihatdan kam bo‘lib qolgan jamoa, himoyaga ko‘proq e’tibor berishi aniq. Bu bizga qiyinchilik tug‘dirdi. So‘nggi 25 daqiqada raqib zich himoyalangani tufayli yaxshi kombinatsiyalar amalga oshira olmadik. “Xorazm” zich va yaxshi himoyalandi. To‘g‘ri, standart vaziyatlardan gol urishimiz mumkin edi, ammo buni uddalay olmadik. “Xorazm” bir kishi kam bo‘lib ham bir nechta xavfli vaziyatga ega bo‘ldi. Shu sababli bugungi durang adolatli natija bo‘ldi deb o‘ylayman.
– “Qo‘qon-1912” jamoasi yaxshi o‘yin namoyish etmoqda, ammo jamoangizga barqarorlik yetishmayapti. Bunga sabab nima?
– E’tibor bergan bo‘lsangiz, ikkinchi davradagi “Buxoro”ga mag‘lub bo‘lgan o‘yinimizdan tashqari qolgan barcha bahslarda biz ustunlik qilyapmiz, ammo e’tiborsizlik tufayli ko‘p gol o‘tkazib yuboryapmiz. Kam gol urmoqdamiz, bu ham muammo. Ko‘proq e’tiborli bo‘lishimiz kerak. Yuqori darajali futbolchilar yetishmayapti. Uch-to‘rtta bahslardagi duranglarni g‘alabaga aylantira olganimizda, musobaqa jadvalida yanada balandroqda bo‘lardik. Bugungi uchrashuvni bevosita kuzatish uchun tashrif buyurgan va bizni qo‘llab-quvvatlab turgan muxlislarimizga o‘z minnatdorchiligimni bildiraman.
