16.08.2018

17 август куни жамоамиз Pepsi суперлига 22-тур доирасида Фарғонанинг “Нефтчи” клуби меҳмони бўлади. Биринчи босқичнинг сўнгги туридан ўрин олган ушбу баҳс мухлис ва мутахассисларда катта қизиқиш ўйғотган. Худди “Пахтакор”га қарши кечган ўйинда бўлгани каби бу сафар ҳам вакилларимиз фақат ғалаба учун майдонга тушишади.
Умуман олганда, дербилар ҳар доим шиддатли ва кескин курашларга бой ўтишини барчамиз яхши биламиз. Шундай экан жума куни Фарғонадаги “Истиқлол” стадионида ишқибозлар ҳужумкор ўйин гувоҳига айланишларига шубҳа қилмаймиз. Ҳар икки жамоа учун ҳам ғалаба сув ва ҳаводек зарур эканлигини ҳисобга олсак, майдоннинг ҳар бир қаричи учун кескин кураш кечиши аниқ.
Қўқонлик футбол ишқибозлари “Пахтакор” билан бўлган баҳсда ўзларининг нималарга қодир эканликларини намойиш этишди. Мухлисларимизнинг қўллаб-қувватлашлари футболчиларимизга катта руҳий мадад бўлганини таъкидлаш жоиз.

Фарғонада бўладиган учрашувда ҳам Қўқонлик футбол ихлосмандлари 12-ўйинчи бўлишларига ишониб қоламиз. Зеро, сизнинг олқишларингиз жамоамиз муваффақиятида муҳим роль ўйнайди. Олға, Қўқон!