26.09.2018

Эртага Қўқонда ҳақиқий футбол байрами ҳукмронлик қилади, десак муболаға бўлмайди. Ўзбек футболи ватани яна бир тарихий воқеага гувоҳ бўлиши мумкин. “Қўқон-1912” жамоаси Ўзбекистон кубоги ярим финал доирасида Тошкентнинг “Пахтакор” клубига қарши майдонга тушади. Ушбу қарама-қаршилик ҳақидаги айрим маълумотлар билан таништириб ўтамиз.

Кубокдаги баҳслар

Кубок баҳслари доирасида ушбу жамоалар икки марта тўқнаш келишган. Аниқроғи, 2014 йилги Ўзбекистон кубоги 1/8 финалида “Қўқон-1912” жамоаси “Пахтакор”га қарши майдонга тушган. Ўшанда қўқонликлар биринчи лига (ҳозирги Про-лига)да иштирок этишларига қарамай, номдор рақибга етарлича қаршилик кўрсатишган. Қўқонда бўлиб ўтган биринчи учрашувда 0:0 ҳисоби қайд этилгани фикримизга исбот бўла олади. Тошкентдаги ўйинда эса мезбонлар 4:0 ҳисобида ғалаба қозонишган.

 Қўқондаги ўйинлар

Ушбу жамоалар чемпионат ва кубок баҳсларини ҳисоблаганда Қўқонда ўзаро 14 та учрашув ўтказишган. Ўйинларнинг 4 та вакилларимиз ғалаба қозонишган.  “Пахтакор” эса Қўқонда 3 марта зафар қучган. Етти баҳсда дуранг натижа қайд этилган. Яна бир қизиқ маълумот, ушбу жамоаларнинг “Марказий” стадиондаги сўнгги бешта учрашувида кучлар тенг келган.

Факт: 2003 йилдан бери “Пахтакор” Қўқонда ғалаба қозона олмаяпти.

“Марказий”даги сўнгги учрашув

Юқорида айтиб ўтганимиздек, сўнгги йилларда ушбу жамоаларнинг Қўқонда бўлиб ўтаётган ўйинларида дуранг натижа қайд этилмоқда. Ана шундай учрашувлардан бири Pepsi суперлига 21-тури доирасида бўлиб ўтганди. 12 август куни ўтказилган баҳс 1:1 ҳисобида интиҳо топган. Аввалига Марко Милич кутилмаганда ўз дарвозамизни ишғол этиб қўйганди. Кейин эса захирадан майдонга тушган Носир Отақўзиев рақиб дарвозасини аниқ нишонга олиб ҳисобни тенглаштирган.
Pepsi суперлига
21-тур
“Қўқон-1912” – “Пахтакор” – 1:1 (0:0)
Ҳакамлар: Шерзод Қосимов, Расул Фозилов, Мўмин Мажидов, Жасур Мухторов.
Назоратчи: Сайфиддин Эрматов.
Комиссар: Маъмур Саидқосимов.
Голлар: Носир Отақўзиев – 75. – Марко Милич – 52 (автогол).
“Қўқон-1912”: 1. Ўткир Юсупов, 5. Ғиёс Комилов, 11. Фирдавс Асадов (4. Баҳодир Акрамов – 88), 15. Ойбек Рустамов, 17. Қувондиқ Рўзиев, 19. Суҳроб Бердиев (9. Носир Отақўзиев – 69), 22. Мурод Холмуҳаммедов, 23. Александр Мерзляков, 55. Дарко Гожкович (96. Муҳаммаданас Ҳасанов-57), 65. Марко Милич, 79. Иқбол Маликжонов.
Захира: 71. Сарвар Каримов, 41. Савелий Абрамов, 78. Бехруз Садиллоев, 97. Муслим Қурбонов.
“Пахтакор”: 25. Элдор Суюнов, 4. Шерзод Аъзамов, 7. Азим Аҳмедов (10. Жамшид Искандеров – 59), 8. Дилшод Раҳматуллаев, 11. Исмаэль Гонсалвеш (18. Баҳром Абдураҳимов – 82), 29. Владимир Козак, 34. Фаррух Сайфиев, 55. Марко Симич, 69. Драган Черан, 77. Тиаго Безерра (21. Камолиддин Тожиев – 70), 88. Игорь Сергеев.
Захира: 12. Александр Лобанов, 2. Акмал Шораҳмедов, 6. Жаҳонгир Аҳмадов, 15. Егор Кримец, 27. Достон Ибрагимов, 40. Алишер Салимов.

Бошланиш вақтлари

Ўзбекистон кубоги ярим финал доирасидаги “Қўқон-1912” – “Пахтакор” учрашуви 27 сентябрь куни “Марказий” стадионда соат 18:30да бошланади. Барча мухлисларимизни финалдан олдинги финал дея таърифланаётган тарихий ўйинлардан бирига таклиф этиб қоламиз.