22.03.2019

Аввал хабар бериб ўтганимиздек, “Қўқон-1912” жамоасининг Тошкентдаги йиғини давом этмоқда. Футболчиларимиз навбатдаги “водий дербиси”да мухлисларни хурсанд этишни мақсад қилишган ва бунинг учун машғулотларда астойдил меҳнат қилишмоқда.

Қўқонликлар йиғин давомида битта назорат учрашувини ўтказишганди. Бундан бир неча кун аввал Нўъмон Ҳасанов шогирдлари Про-лига вакили – “Локомотив БФК”ни 7:0 ҳисобида доғда қолдиришганди.

Режада яна битта ўртоқлик ўйини бор. Бу галги рақиб эса анча жиддий –  мамлакатимизнинг номдор жамоаларидан бири “Пахтакор” бўлади. “Шерлар”га қарши кечадиган учрашув 24 март кунига белгиланган. Мазкур баҳснинг қайси стадионда ўтиши ва бошланиш вақти ҳақида кейинроқ маълумот бериб ўтамиз.