26.01.2021

“Қўқон-1912” жамоаси бугун Фарғонада давом этаётган “Вилоят ҳокими кубоги-2021”даги иккинчи учрашувини ўтказди. Вакилларимизнинг гуруҳ босқичидаги навбатдаги рақиби – “Бухоро” клуби бўлди. Учрашув кутилганидек жамоамиз ҳужумлари билан бошланди. 5-дақиқада Авазхон Маматхўжаев ўнг қанотдан чиройли узатма билан Синдаровни қулай вазиятга чиқарган эди. Собитнинг зарбасига озгина аниқлик етишмади. 25-дақиқада Муҳаммаданас Ҳасановнинг яқин бурчакка йўллаган зарбасини “Бухоро” дарвозабони аранг қайтарди.

Бугунги учрашув “Хоким кубоги” мусобақасининг безаги бўлди, десак муболаға бўлмайди. Ҳар икки жамоа футболчилари мухлисларбоп,, жанговор футбол намойиш қилишди. Биринчи бўлимнинг сўнгги дақиқасида Сардор Азимов узоқ масофадан рақиб дарвозабонини ҳушёрлигини текшириб кўрди. Танаффусга жамоалар нурсиз дуранг билан чиқиб кетишди.

Иккинчи бўлимни ҳам футболчиларимиз шиддатли ҳужумлар билан бошлашди. Бухороликлар эса қарши ҳужумлардан самара келтиришга ҳаракат қилишди. 58-дақиқада футболчиларимиз учрашувдаги энг хавфли вазият содир этишди. Муҳаммаданас Ҳасанов чап қанотдан рақиб жарима майдончасига узатмани амалга оширди. Мўмин Мелиевнинг боши билан берган зарбаси салгина юқоридан кетди. 63-дақиқада бухороликларда яхши вазият юзага келди. Хуршид Хўжаевнинг маҳорати жамоамизни голдан қутқариб қолди. 65-дақиқада вакилларимиз жарима тўпи тепиш ҳуқуқига эга бўлишди. Муҳаммаданас Ҳасановнинг кучли зарбасини дарвозабон ушлаб олди. 73-дақиқада яна бир стандарт вазиятга эга бўлишди вакилларимиз. Бу сафар Холмуҳаммедовнинг зарбаси тўғри дарвозабоннинг қўлига бориб тушди. 80-дақиқада Сардор Етовқўзиевнинг кучли зарбасини рақиб дарвозабони аранг қайтарди. Қайтган тўпга етиб борган Норбеков эса ўйиндан ташқари ҳолатда деб топилди.

Қолган дақиқаларда ҳар икки жамоада бир қатор вазиятлар юзага келганига қарамай, ҳисоб ўзгаришсиз қолди ва учрашув нурсиз дуранг билан якун топди.

 

“ВИЛОЯТ ҲОКИМИ КУБОГИ- 2021”

“D” гуруҳи.

2-тур.

“Қўқон-1912” – “Бухоро”  – 0:0

Ҳакамлар: Достон Мирзараимов, Шоҳрух Аъзамов, Азиз Исақов.

Назоратчи: Султон Зайлобиддинов

“Қўқон-1912”: Хуршид Хўжаев, Бобур Акбаров, Собит Синдаров (Сардор Етовқўзиев – 68), Рустам Абдуҳамидов, Сардор Азимов,  Аваз Маматхўжаев, Фарҳод Бекмуродов (Муҳаммаданас Ҳасанов – 54), Иқбол Маликжонов (Ойбек Рустамов – 54), Александр Мерзляков (Шоҳназар Норбеков – 54), Мурод Холмуҳаммедов, Мўмин Мелиев (Шохрух Холматов – 88).

Захира: Музаффар Абдуллаев, Элдор Адҳамов, Азамат Исроилов, Муҳсин Норматов.

“Бухоро”: Сардор Қобулжонов, Миржалол Жумаев, Жасур Уринов, Анвар Жўраев, Шавкат Саломов, Санъат Шихов, Алишер Саноев, Бобур Қосимов, Қаҳрамон Баҳодиров, Файзулло Жуманқўзиев, Амир Сафаров.

Захира: Раҳат Жапаров, Ҳаким Алламхонов, Абдужамол Исроилов, Суҳроб Ярашев, Суҳроб Неъматов, Шаҳзод Бешимов, Жавоҳир Шодмонов, Дидар Дурдиев, Адилет Канибеков.