19.01.2022

Бахтиёр Ашурматов шогирдларининг Тошкентдаги ўқув-йиғин машғулотлари давом этмоқда. Ноқулай об-ҳаво шароитига қарамасдан мураббийлар штаби машғулотларни қатъий график бўйича кунига икки маҳалдан олиб боришяпти. Мураббийларимиз футболчиларимизнинг жисмоний ҳолатларини мавсум бошланишига қадар максимал формага олиб келиш учун бор маҳоратларини ишга солишмоқда.

Жамоамизда селекция ишлари ҳам давом эттирилаётганини алоҳида таъкидлаш лозим. Шу кунларда жамоамиз машғулотларига ўтган мавсумни Термизнинг “Сурхон” жамоасида ўтказган , асли Фарғона футбол академияси тарбияланувчиси бўлган, Исломжон Тошпўлатов қўшилди. 1997-йилда туғилган Исломжон Тошпўлатов футболчилик фаолиятини “Қўқон-1912” жамоасининг ўринбосарлар таркибида бошлаган. Кейинчалик “Нефтчи” ҳамда “Сурхон” жамоаларида муваффақиятли тўп сурди.