15.04.2022

Бугун Ўзбекистон Coca Cola кубоги мусобақасининг “Д” гуруҳида  2-тур учрашувлари давом эттирилди. Яйпандаги “Ўзбекистон” стадионида “Қўқон-1912” жамоаси , 1-лига вакили бўлган “Дўстлик Олтиариқ” жамоасини  қабул қилди.
Учрашув кутилганидек “шунқорлар”нинг устунлиги остида бўлиб ўтди. Ўйиннинг бошидаёқ Қўқонлик футболчилар тезкор гол киритишди. 3-дақиқада ташкил қилинган ҳужумни Жамшид Хасанов аниқ зарба билан якунлаб ўйиндаги ҳисобни очди!
10-дақиқада Олтиариқликлар дастлабки хавфли ҳужумни амалга оширдилар. Муҳиддин Юсуповнинг дарвозамиз бурчагига йўллаган зарбаси аниқ ва кучли чиқди. Музаффар Абдуллаев ажойиб “сейв” намойиш қилиб жамоамизни муқаррар голдан асраб қолди. Орадан бироз ўтиб эса Авазхон Маматхўжаевнинг ўнг қанотдан узатган тўпига аввалига Нурматов боши билан зарба берди, ундан сўнг эса Жамшид Хасанов ҳам боши билан зарба берди. Тўп рақиб дарвозасининг устунига тегиб майдонни тарк этди.
Учрашувнинг 21-дақиқасида тажрибали ҳужумчи Мўйдин Мамазулунов  ўйиндаги ҳисобни тенглаштирди. 1-1 ҳисоби 10 дақиқа сақланиб турди. Бу 10 дақиқанинг орасида Қувондиқ Рўзиев икки марта рақиб посбонининг “ҳушёрлигини” текшириб кўрди.  31-дақиқада Ойбек Рустамов Қўқонликларни ҳисобда олдинга олиб чиқди. Учрашувнинг 1-бўлими шу тарзда жамоамизнинг минимал  ҳисобдаги устунлиги билан якунланди.
2-бўлимда мураббийларимиз бир қатор ёш футболчиларни майдонга туширдилар. Айнан заҳирадан ўйинга қўшилган футболчилар учрашувда яна иккита гол киритилишига замин яратишди. 76-дақиқада  Сардор Азимов ўнг қанотдан рақиб жарима майдончасига ажойиб узатмани амалага оширди. Бу узатмадан сўнг тўпни яна ўша Жамшид Хасанов рақиб дарвозасига жойлаб қўйди. 83-дақиқада Комилов-Хожимирзаев-Азимов-Комилов ижросида чиройли комбинация уюштирилди. Аввалига Сардор Азимов ўнг қанотдан рақиб дарвозасига аниқ зарба йўллади. Унинг зарбасини дарвозабон қийинчилик билан қайтариб юборди. Қайтган тўпга эса биринчи бўлиб Комилов етиб келди ва зарба йўллаб, ҳисобни йирик кўринишга келтириб қўйди. 2005 йилда туғилган футболчимиз иккинчи ўйинида иккинчи голини киритди.
Учрашувнинг қолган дақиқаларида ҳар икки жамоа футболчилари ҳарчанд ҳаракат қилишмасин, дарвозаларга бошқа гол киритилмади.
Бу натижадан сўнг  “Қўқон-1912” жамоаси гуруҳ босқичи якунига етмасдан туриб , муддатидан олдин 1/8 финал йўлланмасини қўлга киритди.

ҚЎҚОН-1912 – ДЎСТЛИК ОЛТИАРИҚ – 4:1
15 апрель 2022 йил. Яйпан. “Ўзбекистон” стадиони. 18:00
Ҳакамлар: Тўрабек Суюнов, Ҳусниддин Ўралов, Ҳусан Худойбердиев, Достон Мирзараимов
Назоратчи: Андрей Тамбовцев
Комиссар: Бекзод Арипов
Голлар: Жамшид Ҳасанов 3, – 1:0. Мўйдин Мамазулумов 21,  – 1:1. Ойбек Рустамов 31, – 2:1, Жамшид Ҳасанов 76, – 3:1, Муроджон Комилов 83, – 4:1
“Қўқон-1912”: 1.Музаффар Абдуллаев, 5.Славко Лукич, 6.Дилшод Раҳматуллаев, 7.Жамшид Ҳасанов, 8.Санъат Шихов, 14.Авазхон Маматхўжаев, 15.Ойбек Рустамов, 17.Қувондиқ Рўзиев, 18.Шаҳзодбек Нурматов, 33.Иван Йосович, 70.Билолхон Тошмирзаев.
Захира: 21.Исломжон Абдуллаев, 4.Илҳомжон Ваҳобов, 13.Сардорбек Азимов, 19.Диёрбек Жалолдинов, 20.Муроджон Комилов, 22.Сардор Етовқўзиев, 23.Александр Мерзляков, 27.Анваржон Ҳожимирзаев, 99.Абдуллажон Юнусов.

“Дўстлик Олтиариқ”: 30.Хуршид Муҳаммадов, 2.Аброр Тўхтасинов, 3.Оқил Маҳмудов, 4.Фурқат Ҳасанбоев, 7.Зарбулло Умаров, 9.Муҳаммадҳайит Қўлдошев, 10.Мўйдин Мамазулумов, 13.Асрор Қурбонов, 14.Муҳиддин Юсупов, 17.Хушнуд Бозоров, 18.Элнур Турғунов.
Захира: 12.Жасурбек Абдуллаев, 5.Достон Мелиқўзиев, 6.Юрсинали Топволдиев, 8.Мусобек Музаффаров, 11.Иқболмирзо Нўъмонов, 15.Жавоҳир Аъзамов, 22.Иброҳим Расулов, 23.Ҳусниддин Шаробиддинзода, 24.Умид Исроилов.