20.01.2025

Superligaga qaytgan “Qoʻqon-1912” jamoasi yangi mavsumga qizgʻin hozirlik olib bormoqda.

“Shunqorlar” yaqinda mudofaa chizigʻidagi muammolarni bartaraf etish maqsadida Jasurbek Yoqubovni taklif qildi va tomonlar rasman shartnoma imzoladi. Biz esa uning yangi jamoasidagi fikrlarini tingladik.

“Jamoadagilar menga begona emas. Bahrom Haydarov, Rustam Aripov bilan birga ”Surxon“da ishlaganmiz. Ularning taklifini oʻylab oʻtirmadim. Sababi Qoʻqon oʻzimni uyim. Bir necha yil oldin toʻp tepib ketganman. Oʻshandan keyin ”Paxtakor“, ”Bunyodkor“, ”Soʻgʻdiyona“ kabi jamoalarda oʻynadim. Oʻylaymanki, hammasi yaxshi kechdi. Faqat oʻtgan yili ikkinchi davrada jarohat oldim. Hozirda jamoa bilan mashgʻulotlarni boshladim. Shu biroz qiyinchilik tugʻdirdi. Nasib qilgan ekan yana Qoʻqondaman.

Jamoamiz Superligaga qaytdi. Lekin bu degani jon saqlash uchun kurashadi degani emas. Maqsadimiz faqat oldinga intilish. Yuqori va munosib oʻrinlarga harakat qilamiz. Jamoa yomon emas, ahil oila yigʻilgan. Mavsum startigacha bir-birimizni tushunib olamiz. Hozir asosan jismoniy yuklama olyapmiz. Har tomonlama tayyor boʻlamiz”,- deydi Jasurbek Yoqubov.

Manba. Championat.asia