06.09.2021

ЖЧ-2022 саралаши доирасидаги Бразилия — Аргентина ўйини Соқлиқни сақлаш агентлиги (Anvisa) ва полиция вакилларининг стадионда бўлиши туфайли 7-дақиқада тўхтатилди.

Сабаб шуки, Бразилиядаги карантин талабларига кўра Буюк Британиядан келганлар 14 кун карантинда бўлиши керак. Аммо меҳмонларнинг АПЛда ўйновчи 4 ўйинчиси қайдномага киритилган ва улардан 3 нафари — Эмилиано Мартинес, Кристиан Ромеро ҳамда Жованни Ло Челсо майдонга тушганди, Эмилиано Буэндиа эса захирада қолдирилган.

Натижада Бразилия полицияси ўйин вақтида стадионга тушиб келиб, 4 нафар аргентиналик футболчини майдондан олиб чиқиб кетишга уринди. Оқибатда Аргентина миллий жамоасининг бошқа футболчилари ҳам майдонни тарк этишди ва жамоа аэропортга йўл олди.

Эндиликда бош ҳакам ва ўйин комиссари ФИФА интизом қўмитасига ҳисобот юборади.

Бразилия соғлиқни сақлаш агентлигининг таъкидлашича, Аргентинанинг 4 ўйинчиси Буюк Британиядан анча аввал келганликларини айтиб, иммиграция расмийларига ёлғон маълумот беришган. Футболчиларни меҳмонхонада ушлаш ва кейин депортация қилиш учун полиция юборилган. Бироқ ҳуқуқ-тартибот ходимлари етиб борганда, ўйинчилар стадионга кетиб бўлишган.